शाके १७६३
एक विद्वत् शैली में
संक्षिप्त प्रस्तुति
ॐ भगवान शिवकें नमस्कार ।। मिथिला नगरीमे विख्यात उत्तम हरिम कुलमे जन्म लेनिहार रघुदेव मिश्र समस्त पृथ्वी पर विख्यात भेलाह । इनक पुत्र पतंजलिक समान विद्वानमे श्रेष्ठ मोहन मिश्र नामें पृथ्वी पर प्रसिद्ध भेलाह, पछाति हुनको दू गोट पुत्र भेलैन्हि ।।१।।
तेकर हुनक अनुज, विनम्र शुद्ध बुद्धिक, न्याय आ धर्मशास्त्रमे पारंगत श्री सिद्धिनाथ छलाह । ओ बृहस्पतिए जकाँ विद्वान अपन पूजनीय पितासँ विद्या प्राप्तकए नित्य दिन भगवती जगदम्बिका आ भगवान शिवक चरण कमलमे भ्रमर सदृश रहैत छलाह ।।२।।
स्वच्छ कीर्तिरूपी पूर्णिमाक चन्द्रमा स्वरूप मिथिलाक अधिपति श्री श्री श्री रुद्र सिंहक सेवा कए हुनकासँ अभिलाषित पर्याप्त सम्पत्ति प्राप्त कए नर्मदा कुंडक मध्यसँ पार्वती पति महादेवक तीन गोट मूर्ति आनि अपन एहि गाममे मन्दिर बनबाए, लगहिमे पोखरि खुनबाए अनेकानक विद्वानक सहायतासँ क्रमशः ओही तीनू मूर्तिक स्थापना कएलैन्हि ।।३।।
ओहिमेसँ दुगट मूर्ति माता-पिताकें गिरिजापति भगवान शिवक सायुज्य मुक्ति प्राप्ति हेतु आ तेसर मूर्ति सकल अभिलाषित वस्तुक प्राप्ति हेतु । तीनू मूर्ति शाक 1763 मे चैत्र शुक्ल दशमी बृहस्पतिकें धर्मशास्त्रक विधि अनुसार स्थापित कएल गेल ।।४।। म०म० मोहन मिश्रक वंशजक द्वारा स्थापित पहिल एवं सभसँ प्राचीन देवालए (मन्दिर) इएह अछि ।
